Nikki Haley, sem er ein af frambjóðendum í forvali Repúblikana fyrir forsetakosningarnar í Bandaríkjunum 2024, sagði á kosningafundi í gær að bandaríska borgarastyrjöldin hefði snúist um hlutverk hins opinbera en nefndi ekki þrælahald sem almennt hefur verið talið helsta orsök styrjaldarinnar.

NBC greinir frá þessu.

Fundurinn fór fram í New Hampshire en kjósandi sem var viðstaddur fundinn spurði Haley beint út hver væri osrsök bandarísku borgarastyrjaldarinnar.

Haley er fyrrverandi ríkisstjóri Suður-Karólínu ríkis og fyrrverandi sendiherra Bandaríkjanna hjá Sameinuðu þjóðunum. Donald Trump skipaði hana í síðarnefnda embættið í forsetatíð sinni en eins og kunnugt er býður hann sig einnig fram í forvali Repúblikana. Haley hefur sagt í kosningabaráttu sinni að hún sé helsti valkosturinn sem Repúblikanar hafi gagnvart Trump.

Í svari sínu við spurningu kjósandans um borgarastyrjöldina sagði Haley meðal annars að hún teldi að það sem helst hafi orsakað hana hafi verið frelsi fólks og afskipti hins opinbera af því. Það sé hennar mat að tilgangur þess að hafa stjórnvöld sé að tryggja réttindi og frelsi fólks en að hið opinbera geti ekki gert allt fyrir alla.

Hún sagði að stjórnvöld ættu ekki að segja fólki hvernig það ætti að lifa lífinu heldur tryggja frelsi þess.

Kjósandinn brást við þessu svari Haley og sagðist forviða yfir því að hún hefði ekkert minnst á þrælahald.

„Hvað viltu að ég segi um þrælahald?“ sagði Haley þá.

Jamie Harrison, formaður landsnefndar Demókrata, gagnrýndi Haley harðlega og sagði að fordæming þrælahalds ætti að vera algjört lágmark fyrir hvern þann sem byði sig fram til embættis forseta Bandaríkjanna.