Nú eru tæplega tvö ár síðan Rússar réðust inn í Úkraínu. Svo virðist sem sívaxandi fjöldi rússneskra hermanna vilji gjarnan sleppa úr stríðinu og komast heim. Að minnsta kosti er hægt að lesa þetta út úr símtölum rússneskra hermanna heim til ættingja og vina.

AP skýrir frá þessu á grunni leynilegra upptaka sem fréttaveitan hefur undir höndum.

Á upptökunum heyrast samtöl rússneskra hermanna, sem hringja heim frá vígvellinum í Úkraínu, við ættingja og vini.

Á einni upptökunni heyrist rússneskur hermaður, sem er í Kharkiv í Úkraínu, hringja í bróður sinn og segja: „Það er enginn helvítis „deyðu hetjudauða“ hér. Þú deyrð bara eins og helvítis regnormur.“

Í upphafi stríðsins notuðust Rússar aðallega við atvinnuhermenn en eftir því sem stríðið hefur dregist á langinn hafa þeir þurft að kalla menn úr mörgum samfélagshópum til herþjónustu.

Mennirnir, sem heyrist í á upptökunum, hafa ekki náð að koma sér hjá herþjónustu. Sumir vegna peningaleysis, aðrir vegna menntunarskorts eða af öðrum ástæðum. Þeir hafa enga fyrri reynslu af því að gegna herþjónustu.

Einn vann við kjötvinnslu, annar hjá lögfræðistofu og sá þriðji í stórmarkaði.