Geir Þorsteinsson, fyrrum formaður KSÍ leggur fram nokkuð áhugaverða tillögu til þess að Grindavík geti haldið áfram óbreyttu íþróttastarfi. Grindvíkingar þurftu að yfirgefa heimili sín fyrir tíu dögum vegna jarðhræringa
Ljóst er að Grindvíkingar geta ekki æft á heimaslóðum næstu mánuði og félaginu vantar því samastað. Fótboltinn hefur æft á Álftanesi síðustu daga og körfuboltinn spilað leiki í Smáranum í Kópavogi.
Geir leggur til að Grindavík fái heimili næstu mánuði í Safamýri, þar var Fram áður til húsa en Víkingur Reykjavík er með svæðið í dag.
„Grindavík on my mind,“ skrifar Geir á Facebook síðu sinni.
Hann leggur til að Grindavík fái þarna tímabundna aðstöðu. „Væri ekki tilvalið að bjóða íþróttafólkinu í Grindavík tímabundna aðstöðu í Safamýri á gamla góða íþróttasvæði Fram og núna Víkings.“
„Þar er íþróttahús, knattspyrnuvellir og góður félagssalur. Víkingur hefur held ég verið að hefja einhverja starfsemi þar og gætu hugsanlega sýnt sveigjanleika í þeirri breytingu. Þar gætu keppnislið félagsins í körfu og fótbolta átt tímabundið heimili og æfingar allra flokka farið fram. En svo er spurningin hvort slíkt myndi henta Grindvíkingum.“
