Fjórir einstaklingar hafa verið ákærðir í Bretlandi fyrir að stela rándýru 18-karata gullklósetti árið 2019. Um er að ræða listaverk sem var hannað af ítalska listamanninum Maurizio Cattelan og var metið á rúmar 800 milljónir króna þegar því var stolið úr Blenheim-höll, þar sem það var til sýnis, skammt fyrir utan Oxford.
Þjófnaðurinn vakti talsverða athygli á sínum tíma en þjófarnir ollu miklu vatnstjóni þegar klósettið var rifið út enda virkaði það fullkomlega og var tengt við skólplagnir hallarinnar. Klósettið fokdýra hafði aðeins verið til sýnis í tvo daga í höllinni þegar þjófnaðurinn átti sér stað en upphaflega lá listamaðurinn sjálfur undir grun um að hafa framið gjörning með því að skipuleggja þjófnaðinn sjálfur. Því neitaði hann hatrammlega.
Af og til hafa borist fregnir af því að einhverjir hafi verið handteknir vegna málsins en sjö slíkar handtökur hafa átt sér stað í gegnum árin. Ekkert hefur þó bólað á klósettinu né ákærum, allt þar til nú.
Fjórmenningarnir sem hafa verið ákærð eru öll á fertugsaldri og heita James Sheen, Michael Jones, Fred Doe og Bora Guccuk.
Málið verður tekið fyrir í dómstól í Oxford þann 28. nóvember næstkomandi og þá ætti að koma í ljós hver urðu afdrif hins sauruga listaverks.
