Kóríander er vinsæl kryddjurt sem flestir kunna vel að meta. Flestir finna fyrir vott af steinselju og sítrónu sem gerir það að verkum að kóríander leikur stórt hlutverk í fjölmörgum réttum í hinum ýmsu menningarheimum. Þó eru aðrir sem að gjörsamlega þola ekki kryddjurtina og telja flest það sem hún snertir óætt. Einn sú þekktasta sem var á þeirri skoðun var matreiðslukonan Julia Child sem hafði megna skömm á jurtinni.

Það er þó ekki endilega persónulegur smekkur sem ræður för heldur er ástæðan erfðafræðilegs eðlis. Sumir einstaklingar eru með sérstakt gen sem veldur því að þeir finna mun sterkara bragð af aldehýðum sem eru í litlu magni í jurtinni. Afleiðingarnar eru þær að viðkomandi finnur vont sápubragð þegar bragðað er á kryddjurtinni.

Þessi genagalli (nú eða genakostur eftir því hvernig á það er litið) finnst aðeins í litlum hluta mannkyns og er það hlutfall breytilegt eftir búsetu fólks. Þannig er agnarsmátt hlutfall fólks með þetta gen þar sem kóríanderjurtin er í hávegum höfð í matargerð, eins og á Indlandi og Mið-Ameríku.

Hlutfallið er hæst í Austur-Asíu en sumstaðar eru um 20 prósent íbúa með genið og því ekki eins mikið um kóríander í þeirri matargerð, eins og gefur að skilja.