Þann 5. september 2014 sátu um 20 liðsmenn Rusich-hópsins fyrir hópi úkraínskra hermanna nærri Kharkiv í austurhluta Úkraínu. Þeir gerðu hrottafengna árás á Úkraínumennina og áður en yfir lauk höfðu þeir limlest um 40 manns og drepið. Því næst brenndu þeir líkin. Einnig bárust fregnir af því að fjöldi hefði sætt pyntingum.

Hópurinn birti fjölda mynda á samfélagsmiðlum þar sem félagar í honum sátu fyrir á myndum með brunnin lík og pyntuðu fórnarlömb sín. Illmennskan var algjör.

Aldrei hefur verið réttað yfir meðlimum hópsins en hann var settur á lista úkraínskra yfirvalda yfir hryðjuverkasamtök.

Leiðtogar hópsins eru Alexey Milchakov og Yan Petrovsky. Eins og DV skýrði frá í gær þá er Petrovsky nú í haldi Finna og veldur það Pútín miklum vanda.

Dularfull handtaka langt frá Moskvu er stór höfuðverkur fyrir Pútín

Fyrir þremur árum ræddi Milchakov níðingsverkin, sem voru framin sex árum áður, í viðtali sem var birt á Twitter. Þar sagði hann blákalt frá hvernig hann naut þess að skera eyrun af fórnarlömbunum og finna lyktina af brennandi líkum. Í kjölfarið lýsti Christopher Miller, blaðamaður Financial Times, Milchakov sem skrímsli.

Petrovsky bjó um árabil í Noregi þar sem hann starfaði sem húðflúrari og var virkur í samfélagi öfgahægrimanna. Hann var handtekinn 2016 og vísað úr landi.

Bæði Milchakov og Petrovsky börðust í Sýrlandi með Rusichi-hópnum. Samkvæmt skýrslu frá New America þá tóku þeir þátt í óhugnanlegum pyntingum á fanga sem var hlutaður í sundur.