Óvænt uppákoma var í Héraðsdómi Reykjavíkur núna í morgun í aðdraganda málflutnings í stóra kókaínmálinu. Ritstjóri, fréttastjóri og blaðamaður Vísis fengu þar tiltal hjá dómara fyrir að hafa rofið fréttabann dómarans á fréttaflutningi af vitnaleiðslum í málinu.

Í byrjun vitnaleiðslna í málinu, þann 19. janúar, gaf dómari út þá fyrirskipun að fréttaflutningur af vitnaleiðslum væri óheimill þar til vitnaleiðslum væri lokið. Vísir birti hins vegar frétt á föstudag upp úr vitnaleiðslum þvert á þessa fyrirskipun og lét fylgja með í fréttinni að miðillinn teldi dómara túlka of rúmt lagaheimildir til að leggja á fréttabann.

Reimar Pétursson lögmaður mætti fyrir hönd blaðamanna sem skrifuðu fréttina en ritstjóri Vísis, Erla Björk Gunnarsdóttir, og fréttastjóri Vísis, Kolbeinn Tumi Daðason, mættu í dómsal. Einnig var formaður Blaðamannfélags Íslands, Sigríður Dögg Auðunsdóttir, viðstödd.

Reimar Pétursson óskaði eftir því að vera skipaður verjandi blaðamannanna og gerði dómari það á staðnum.

Dómari sagði að fulltrúum Vísis væri gefinn kostur á að koma sínum sjónarmiðum á framfæri í málinu en ekki yrði tekin afstaða í dag til mögulegra viðurlaga. Lögmaður blaðamannanna sagðist ekki hafa fengið gögn í málinu og lagði til að hann fengi gögnin áður en málið héldi áfram.

Reimar telur að viðkomandi lagaákvæði taki eingöngu til skýrslutöku í eintölu þannig að þegar hverri og einni skýrslutöku í opnu þinghaldi er lokið þá sé heimilt að flytja fréttir af henni. Reimar sagði ennfremur að Vísir myndi krefjast sýknu.

Dómari sagði að þetta kæmi allt til skoðunar síðar og myndi ekki hafa áhrif á málflutning í stóra kókaínmálinu.

Málið verður ekki tekið frekar fyrir í dag.