„1976 höfðum við enga hugmynd um hvernig þetta myndi þróast,“ sagði Rybakov í samtali við Bumaga.
Það var ekki fyrr en í nóvember á síðasta ári sem sannleikurinn kom í ljós þegar rússneskur sagnfræðingur var að fara í gegnum dómskjöl. Þau voru gerð opinber 2003 og komið fyrir í vörslu safns í St. Pétursborg.
Í þeim kemur fram að ungi KGB-maðurinn var enginn annar en Vladímír Pútín, forseti Rússlands.
Það hefur aldrei verið nein launung að hann var liðsmaður KGB. Hann var ráðinn þangað ári áður en Rybakov var handtekinn. Það má því telja líklegt að mál Rybakov hafi verið eitt fyrsta málið sem Pútín vann að hjá KGB.
„Nokkrir ungir menn komu og gerðu húsleit. Einn þeirra hét Pútín, hver hefði getað giskað á að hann yrði forseti?“ sagði Rybakov.
Hann var handtekinn þennan dag því í byrjun ágúst hafði hann, ásamt vini sínum, málað slagorð gegn Leonid Bresnjen, forseta Sovétríkjanna, á vegg. „Þú getur krossfest frelsið, en mannssálin þekkir enga hlekki,“ máluðu þeir á vegginn.
Þetta kostaði Rybakov sex ára dvöl í fangelsi og vinnubúðum.
Hann varð síðar stjórnarandstöðuleiðtogi, sat á þingi og í dag berst hann fyrir mannréttindum. Hann telur að Pútín hafi gert Rússum erfiðara fyrir að vera Rússar. „Frá því að Pútín komst til valda, hefur samfélagið okkar verið sannfært um að ríkisvaldið sé miskunnarlaust gagnvart þegnum sínum því hagsmunir ríkisins eru taldir mikilvægari en hagsmunir einstaklingsins og það telur ríkisvaldið alltaf,“ sagði hann.
