Þingfundur er hafinn á Alþingi og virðist strax mikill hiti vera kominn í fólk. Fyrsta mál á dagskrá var tillaga Indriða Inga Stefánssonar, þingmanni Pírata, að útlendingafrumvarpið svokallaða yrði tekið af dagskrá í dag svo hægt væri að fara í önnur mál. Tillagan var svo felld með 31 atkvæði.

Bryndís Haraldsdóttir, þingmaður Sjálfstæðisflokks, tók til máls um tillöguna og var mikill hiti í henni og hækkaði hún rödd sína verulega, og virtist vera kominn með nóg af því sem þingmenn meirihlutans hafa undanfarið kallað málþóf Pírata.

Um það hafi verið samið fyrir jól að útlendingafrumvarpið yrði tekið fyrir á nýju ári og sé kominn tími til að ljúka því máli, en 2. umræða frumvarpsins hefur dregist mjög vegna fjölda ræðna sem hafa verið haldnar um málið. Þingmenn Pírata hafa þó hafnað því að um málþóf sé að ræða.

Undir ræðu hennar mátti heyra ítrekuð framíköll úr þingsal og þurfti forseti Alþingis að minna á það i lok erindis Bryndísar að það sé aðeins einn sem fari með orðið hverju sinni.

„Þetta er orðið ansi þreytt leikrit hér með þessari dagskrártillögu og ég ætla að minna á það að hér fyrir jólin var samið um að taka þetta mál af dagskrá svo hægt væri að klára mikilvæg mál. Og hvað? Jú að taka málið aftur til umfjöllunar í háttvirtri allsherjar- og menntamálanefnd og að málið færi hér á dagskrá sem fyrsta mál eftir áramót.

Það var hluti af samkomulaginu og þetta sýnir það að það er ekki hægt að semja við þingflokk Pírata og ég velti fyrir mér háttvirtir þingmenn, hvað þurfa háttvirtir þingmenn margar ræður til að koma sínum sjónarmiðum á framfæri? Það liggur fyrir hátt í 200 ræður núna. Okkur er ljóst hver sjónarmið þingflokks Pírata er en er ekki lýðræðislegra að við klárum þessa umræðu og förum í atkvæðagreiðslu um málið?“  

Upptöku af þingfundi má finna hér en ræða Bryndísar fór fram klukkan 15:04