Ekki er vitað hvert mannfallið er hjá stríðsaðilum er en að mati sérfræðinga er það mjög mikið.
Rússar virðast hafa sett sér það markmið að ná bænum á sitt vald, sama hvað það kostar. Hefur það vakið nokkra undrun meðal sérfræðinga sem benda á að bærinn hafi sáralítið vægi hernaðarlega séð.
Með því að sækja svo hart að bænum neyða Rússar Úkraínumenn til að binda ákveðinn fjölda hermanna þar til að verja bæinn en með því er hugsanlega hægt að koma í veg fyrir að þeir sæki fram annars staðar.
Breska varnarmálaráðuneytið segir að Rússar séu með stóran hluta af innrásarher sínum nærri bænum og að nú séu þeir komnir svo langt í hernaði sínum að nú sé barist hús úr húsi. Þetta sé ný taktík hjá þeim.
Wagner-hópurinn tekur virkan þátt í bardögunum með rússneska hernum og notar fanga, sem hafa fengið sakaruppgjöf gegn því að berjast í Úkraínu, í fremstu víglínu.
Reuters hefur eftir úkraínskum hermanni að Rússar hafi breytt um taktík. Nú sæki þeir fram í litlum hópum, aðallega á nóttunni. Þeir séu svartklæddir svo það sé erfitt að koma auga á þá. Einnig láti þeir stórskotalið oft berja á úkraínsku hermönnunum.
Bærinn sjálfur hefur að sögn verið nær jafnaður við jörðu en þar eru enn nokkur þúsund almennir borgarar en um 70.000 manns bjuggu í bænum fyrir stríð. Fólk heldur til í kjöllurum og loftvarnarbyrgjum. Mikill skortur er á vatni og mat. Mjög kalt er á svæðinu og er hiti í húsum aðeins 3 til 5 gráður.
