Bandaríska dómsmálaráðuneytið hefur gert sátt við fjölskyldur 16 af þeim 17 sem voru skotin til bana í Marjory Stoneman Douglas high school í Parkland í Flórída 2018.

The Guardian segir að sáttin hafi verið gerð þar sem alríkislögreglan FBI hafi brugðist með því að stöðva árásarmanninn ekki þrátt fyrir að FBI hefði vitneskju um að hann hygðist gera skotárás í skólanum.

Fjölskylda eins nemanda ákvað að taka ekki þátt í málshöfðuninni.

Samtals mun dómsmálaráðuneytið greiða 127,5 milljónir í bætur til fjölskyldnanna sextán. Sáttin felur ekki í sér að ráðuneytið viðurkenni að FBI beri sök á árásinni. Þetta kemur fram í fréttatilkynningu frá ráðuneytinu.

Árásin átti sér stað 14. febrúar 2018. Um fimm vikum áður fékk FBI ábendingu um að fyrrum nemandi við skólann, Nikolas Cruz, hefði keypt byssur og hefði í hyggju að gera skotárás í skólanum. Þessar upplýsingar bárust til sérstakrar upplýsingalínu FBI. Þeim var hins vegar aldrei komið áfram til skrifstofu FBI í Flórída og lögreglan hafði engin afskipti af Cruz. Hann var rekinn úr skólanum ári áður en hann átti sér langa sögu tilfinningavanda og hegðunarvanda.

Cruz, sem er 23 ára, játaði í október að hafa myrt 17 manns í skólanum. Refsing hans verður ákveðin eftir réttarhöld sem hefjast í apríl. Hans bíður annað hvort dauðadómur eða ævilangt fangelsi.