Hér eru á ferðinni undurljúffengar döðlur í sparifötunum úr smiðju Berglindar Hreiðars matar- og lífsstílbloggara sem heldur úti bloggsíðunni Gotterí og gersemar. Það er tilvalið að bjóða upp á þær sem forrétt, á smáréttarhlaðborði nú eða bara þegar ykkur langar í eitthvað gómsætt. Það tekur stutta stund að útbúa þennan rétt og hægt er að plasta þær og geyma í kæli yfir nótt sé þess óskað. Þær eru einstaklega ljúffengar með freyðandi drykkjum.

Fylltar döðlur í hnetuhjúp

Um 15 stykki stórar, ferskar döðlur

150 g mascarpone ostur

2 msk. hunang

50 g saxaðar hnetur/möndlur að eigin vali (til dæmis pekanhnetur, kasjúhnetur, pistasíur, möndlur, jarðhnetur)

Skerið rauf í döðlurnar, fjarlægið steininn og opnið „vasa“ í þær. Blandið Mascarpone osti og hunangi saman í skál, setjið í sprautupoka/zip lock poka og fyllið „vasana“ á döðlunum. Leggið rjómaostahliðina ofan í skál með söxuðum hnetum/möndlum og veltið aðeins um svo það festist vel af blöndu við hverja döðlu. Geymið í kæli þar til bera á fram.