Þetta eru niðurstöður nýrrar rannsóknar sem hefur verið birt í BMJ Open. Niðurstöður rannsóknarinnar sýna að þeir sem verða fyrir áföllum í æsku eru minnst líklegir til að treysta opinberum upplýsingum um kórónuveiruna, fylgja sóttvarnaaðgerðum eða nota andlitsgrímur.
Rannsóknin er bresk og var fjármögnuð af heilbrigðisyfirvöldum í Wales. 2.285 manns, 18 ára og eldri, frá Wales tóku þátt í rannsókninni sem var gerð á árunum 2020 og 2021. Fólkið var spurt út í níu mismunandi erfiðar upplifanir/áföll í æsku og hvort það treysti upplýsingum frá heilbrigðisyfirvöldum. Fólkið var einnig spurt hvort það styddi félagsforðun og notkun andlitsgríma, hvort það bryti sóttvarnareglur og væri efins um bólusetningar gegn veirunni.
Hvað varðar þær erfiðu upplifanir í æsku sem fólkið var spurt út í þá voru það meðal annars vanræksla, andlegt og líkamlegt ofbeldi, kynferðisofbeldi, misnotkun áfengis og/eða fíkniefna, skilnaður foreldra og andleg veikindi foreldra.
Þrátt fyrir að Bretum hafi verið boðið upp á ókeypis bólusetningu gegn veirunni hafa 9% þjóðarinnar ekki látið bólusetja sig.
Helmingur þátttakendanna hafði ekki orðið fyrir neinum áföllum í æsku, 20% höfðu lent í einu eða fleiri, einn af hverjum sex sagðist hafa lent í tveimur eða þremur og einn af hverjum tíu sagðist hafa lent í fjórum eða fleiri.
Niðurstöðurnar sýna að þeim mun fleiri áföllum sem fólk hafði lent í í æsku, þeim mun líklegra var það til að vantreysta upplýsingum heilbrigðisyfirvalda um kórónuveirufaraldurinn og til að finnast yfirvöld setja ósanngjarnar takmarkanir á samfélagið. Þessi hópur var einnig líklegri til að vera andsnúin notkun andlitsgríma.
Þeir sem höfðu orðið fyrir fjórum eða fleiri áföllum í æsku voru tvisvar sinnum líklegri til að brjóta sóttvarnareglur en þeir sem höfðu ekki orðið fyrir neinum áföllum. Hjá þessum hóp var hik við að láta bólusetja sig þrisvar sinnum hærra en hjá þeim sem ekki höfðu orðið fyrir neinu áfalli í æsku.
