Tómas Þór Þórðarsson, umsjónarmaður enska boltans hjá Símanum, er í starfi sem margur knattspyrnuáhugamaðurinn væri til í að vera í. Tómas tók á dögunum viðtal við James Milner, leikmann Liverpool og undir lok viðtalsins ákvað hann að uppfylla loforð sem hann hafði gefið vinkonu sinni.

,,Ég lofaði vinkonu minni, konu hér á Íslandi sem heitir Hanna, að skila til þín kveðju. Hún er í stjórn knattspyrnuskóla Liverpool hér á landi og er held ég harðast stuðningsmaður liðsins á Íslandi. Hún klæðist eingöngu Liverpool-fatnaði og bað mig um að skila til þín góðri kveðju,“ sagði Tómas Þór við James Milner, leikmann Liverpool.

Milner tók afar vel í kveðjuna og þakkaði Tómasi fyrir að koma kveðjunni til skila og Hönnu fyrir kveðjuna.

,,Takk, ég bið að heilsa henni,“ sagði James Milner, leikmaður Liverpool.

James biður að heilsa, sömuleiðis. https://t.co/SjJ197Msnr pic.twitter.com/crvDoNnt1e

— Tómas Þór Þórðarson (@tomthordarson) January 20, 2022

Hanna verður án efa mjög ánægð með kveðjuna frá einum dáðasta leikmanni Liverpool síðustu ára. Hanna er einn harðasti Liverpool stuðningsmaður landsins og ein af þeim sem sá til þess að knattspyrnuskóli Liverpool hér á landi varð að veruleika.

Hanna lýsti því í viðtali við Mosfellingur.is hvernig henni datt í hug að reyna fá knattspyrnuskóla Liverpool til landsins eftir samtal við Guðjón Svansson en strákarnir hans höfðu á sínum tíma farið í knattspyrnuskóla Liverpool á Barbadis.

,,Skömmu seinna er ég á leiðinni á leik í Liverpool og Gaui fékk þjálfarana sem hann hafði kynnst á Barbados til þess að hitta mig, en sá þjálfari var kominn í fullt starf hjá Liverpool Academy. Í stuttu máli þá samþykkti hann að skólinn kæmi til prufu einu sinni. Níu árum seinna er hann ennþá í fullum gangi,“ segir Hanna í viðtali við Mosfellingur.is en viðtalið var tekið árið 2019.