Það er oft vont að vera vitur eftirá, eða svo er sagt. Þessu fékk kona ein í Ástralíu að kynnast nýlega þegar hún dauðsá eftir því að hafa sagt kærastanum upp. Þá voru góð ráð dýr. Hún vildi alls ekki sjá á eftir kærastanum eftir allt saman og þurfti að vinna hann til baka.
Konan, Tash Sgardelis, ákvað að engu skildi til sparað við að vinna ástir fyrrverandi til baka og ákvað hún að taka upp allt ferlið og deila á samfélagsmiðlum.
„Ég er búinn að hitta mann – eða ég var að hitta mann – og allt var að ganga vel. Ég hlakkaði til að hitta hann um leið og hann fór frá mér og mér hafði aldrei liðið þannig áður.“
Allt var sem sagt að ganga eins og í sögu. Allt þar til kvöld eitt þau fengu sér í glas saman og maðurinn ákvað að hætta við að hitta hana daginn eftir.
„Ég held að þá hafi bara margar ógeðslega slæmar reynslur rifjast upp fyrir mér og ég hafi farið í baklás,“ sagði Tash í myndbandi sem hún deildi. „Ég þaggaði niður í honum og sleit þessu þarna á staðnum, sem ég svo sá eftir 10 mínútum síðar.“
Þegar Tash gerði sér grein fyrir mistökum sínum ákvað hún að gera hvað hún gæti til að fá þennan draumaprins til að fyrirgefa henni hvatvísina. Hann var þó ekki til í að ræða málin við hana og taldi ljóst að þau ættu ekki samleið. Þá ákvað Tash að hugsa stærra.
Hún rifjaði upp að á einu stefnumóti þar sem þau fóru í mínígólf hafi maðurinn sagt í gríni að hann ætti að láta prenta 100 afrit af úrslitum leiksins og láta senda í vinnuna til Tash. Svo Tash ákvað að gera einmitt það, nema senda heim til mannsins.
„Hann á eftir að hugsa að ég sé algjörlega galin, eða honum á eftir að finnast þetta krúttlegt og kannski þá tala við mig aftur. Á þessum tímapunkti hef ég engu að tapa svo sjáum hvernig þetta gengur.“ sagði hún í myndbandi.
@_tashsgardelis Attempting to recover yet another dating fail.. #dating #singlelife #datingfails #failedtalkingstage #fail #fypシ #2121 #foryou ♬ Happy Up Beat (Medium) – TimTaj
Fyrst virtist það ekki hafa virkað. Hún deildi myndbandi þar sem hún sagði að þremur dögum eftir að hún fór með þetta til hans hafi hann enn ekki svarað henni. „Svona er þetta bara. Ég sé samt ekki eftir að hafa gert þetta. Ég er stolt af sjálfri mér fyrir að hafa berskjaldað mig svona, en ég hef aldrei gert það áður.“
Síðan rúmlega viku síðar svaraði maðurinn og sagðist kunna að meta gjöfina og var til í að hitta Tash aftur eftir áramót. En áður en nokkuð varð úr því skipti hann um skoðun og sagði Tash að rétt væri að þau héldu alfarið í sundur.
„Jæja ætli ég sætti mig ekki við að þetta sé alveg búið núna,“ sagði hún enn einu myndbandinu. Líklega væri best að byrja bara nýja árið upp á nýtt.
