Leikarinn geðþekki Keanu Reeves hefur loksins tjáð sig um þrálátan orðróm um að hann sé búinn að vera giftur leikkonunni Winona Ryder síðan árið 1992.
Sagan segir að við tökur á kvikmyndinni Bram Stoker’s Dracula þá hafi leikstjórinn, Francis Ford Coppola, leitt leikarana tvo saman í brúðkaups-senu sem hafi í reynd verið lagalega bindandi hjónavígsla.
Winona hefur áður tjáð sig um málið en hún sagði í samtali við Entertainment Weekly fyrir nokkrum árum: „Við giftum okkur í alvörunni í Dracula. Ég sver til guðs, ég held að við séum í raun og veru gift.“
Winona sagði að leikstjórinn hafi notast við alvöru rúmenskan prest í atriðinu. „Hann fór í gegnum allt ferlið svo ég held að við séum gift.“
Coppola hefur tekið undir með Winonu en hann sagði skömmu eftir viðtal hennar: „Að vissu leyti, þegar tökum var lokið, gerðum við okkur grein fyrir að Keanu og Winona væru gift eftir þetta atriði og þessa athöfn.“
Nú hefur Keanu loksins tjáð sig um þennan orðróm. En hann sagði í viðtali við Esquire:
„Við gerðum heila töku af hjónavígslu með raunverulegum prest. Winona segir að við séum gift, Coppola segir að við séum gift. Svo ég býst við að við séum gift í augum guðs.“
Keanu er nú í sambandi með listakonunni Alexöndru Grant og Winona hefur verið í sambandi með hönnuðinum Scott Mackinlay Hahn frá árinu 2011.
Hvorki Keany né Winona hafa þó tjáð sig um hvort að ef til vill væri rétt að kanna hjúskaparstöðu sína formlega og þá eftir atvikum leita eftir skilnaði. En ef það er raunin að þau hafi verið löglega gift síðan árið 1992 þá fer þetta að vera með langlífari hjónaböndunum í Hollywood.
