Þetta eru niðurstöður nýrrar rannsóknar fuglaverndunarsamtakanna Birdlife International.
Mesta fækkunin var hjá spörfuglum. Gráspörvum fækkaði um 247 milljónir, eða um helming. Maríuerlum fækkaði um 97 milljónir, störum um 75 milljónir og sönglævirkjum um 68 milljónir.
Það eru aðallega breytingar í landbúnaði sem hafa komið illa við spörfuglana. En þeim hefur einnig fækkað í þéttbýli. Ekki er vitað með vissu hvað veldur því en talið er að fæðuskortur geti komið við sögu, fuglamalaría eða loftmengun að því er segir í tilkynningu frá Birdlife International.
Mesta fækkunin átti sér stað á níunda og tíunda áratugnum en á síðasta áratug hefur dregið úr fækkuninni. Birdlife International segir að því megi aðallega þakka reglugerð ESB um vernd villtra fugla í aðildarríkjunum 27.
En Anna Staneva, hjá Birdlife, segir að meira þurfi til ef fuglum á ekki að fækka meira. Hún segir að rannsóknin sýni að náttúran sé að vara okkur við. „Venjulegir fuglar verða minni og síður algengir. Aðallega af því að þeim svæðum, sem þeir eru háðir, er eytt af mönnum,“ segir hún.
