Á sjöunda tímanum í gær var ekið á 9 ára dreng, sem var á rafmagnshlaupahjóli, í Kópavogi. Drengurinn var fluttur með sjúkrabifreið á slysadeild. Að sögn forráðamanns var hann marinn og aumur en óbrotinn.

Á tíunda tímanum valt bíll í Garðabæ. Ökumaðurinn komst að sjálfsdáðum út úr honum en farþegi var fastur. Slökkviliðsmenn losuðu manninn úr bifreiðinni og var hann fluttur á slysadeild. Ekki er vitað um alvarleika meiðsla hans. Ökumaðurinn var einnig fluttur á slysadeild en hann er grunaður um að hafa verið undir áhrifum fíkniefna.

Á Seltjarnarnesi missti ökumaður stjórn á bifreið sinni á tólfta tímanum í gær og lenti bifreiðin á ljósastaur. Ökumaður og tveir farþegar voru fluttir með sjúkrabifreiðum á slysadeild.

Á sjöunda tímanum í gær féll kona af hestbaki í Garðabæ þegar hún var að temja hest. Hún var með verki í kvið og höfði. Hún var flutt með sjúkrabifreið á slysadeild.