Real Madrid missti bæði Raphael Varane og Sergio Ramos frá félaginu í sumar og vildi Carlo Ancelotti, þjálfari Real Madrid, fá David Luiz til félagsins til þess að fylla í skarðið sem þeir skildu eftir.
Ramos fór frá Real Madrid til PSG á frjálsri sölu í sumar en Varane var keyptur til Manchester United. Þeir hafa myndað frábært varnarpar hjá spænska stórveldinu síðustu ár.
Að því er segir í frétt AS vildi Carlo Ancelotti fá David Luiz til félagsins til að fylla í þeirra skarð en Luiz ákvað frekar að snúa til Brasilíu en hann samdi við Flamengo. Ancelotti getur valið úr David Alaba, Eder Militao, Nacho og Jesus Vallejo í miðvarðarstöðuna.
Ancelotti hefur greinilega miklar mætur á Luiz en hann fékk hann til Chelsea á sínum tíma.