Knattspyrnuvefsíðan Fótbolti.net hefur óskað eftir svörum frá FH vegna ásakanna um að leikmaður í meistaraflokki félagsins sé sakaður nauðgun. Fótbolti.net byggir frétt sína á Twitter færslu sem Hulda Hrund Sigmundsdóttir, meðlimur í aðgerðarhópnum Öfgar setti fram á Twitter síðu sína.
Knattspyrnuhreyfingin á Íslandi situr undir þungum ásökunum þessa dagana þar sem fjöldi meintra kynferðisbrota er til umræðu.
„Við getum þó gefið Klöru það að hún sagði satt og rétt frá að hópnauðgunarferlið gekk ekki betur en það að meintur gerandinn er enn í byrjunarliði FH og þjálfar yngri flokka,“ skrifar Hulda Hrund á Twitter.
Við getum þó gefið Klöru það að hún sagði satt og rétt frá að hópnauðgunarferlið gekk ekki betur en það að meintur gerandinn er enn í byrjunarliði FH og þjálfar yngri flokka.
— Hulda Hrund (@hulda_hrund) August 31, 2021
Í frétt Fótbolta.net segir svo enn fremur. „Fótbolti.net hefur óskað eftir viðbrögðum frá FH vegna málsins.“
Öll stjórn KSÍ hefur sagt af sér og sömuleiðis Guðni Bergsson vegna vinnubragða sambandsins í þessum málaflokki. Klara Bjartmarz framkvæmdarstjóri KSÍ ætlar að halda sínu starfi áfram og er það umdeilt.
„Að gefnu tilefni vilja Öfgar og forvarnarhópurinn Bleiki fíllinn árétta að friðsælu mótmælunum verður haldið til streitu nk. fimmtudag. Ástæðan er sú að Klara þarf að fara. Mæting er kl. 17:00 fyrir utan Laugardalsvöll fimmtudaginn 2. september. Framferði Klöru er óboðlegt. Hún hefur fengið að skauta framhjá sannleikanum ítrekað, axlar enga ábyrgð og virðist ekkert sjá rangt við sitt framferði. Hún reynir að varpa ábyrgðinni á öll önnur í kringum sig, en sér ekkert að hjá sér sjálfri,“ segir í yfirlýsingunni frá hópnum.
