Lagið „Engin mistök“ er komið út. Þetta er fyrsta lagið af væntanlegri LP-plötu Dr. Gunna, „Nei, ókei“ sem kemur út í haust. Gestasöngvari er Eiríkur Hauksson. Lagið segir frá manni sem er sífellt í leit að „besta kvöldi lífs síns“ og er staðráðinn í að gera „engin mistök“. Lagið er óður til þeirra óteljandi sem halda áfram að leita hinnar úfórísku alsælu hins fullkomna djamms.

Eiríkur var fenginn til að syngja lagið því enginn annar hefði getað það. Bakradda-tríó er leitt af Kristjönu Stefánsdóttur en auk hennar syngja þær Rakel Sigurðardóttir og Guðrún Ásta Tryggvadóttir. Árni Hjörvar sá um upptökur og hljóðblöndun.

„Nei, ókei“ verður 12 laga LP-plata, sú fyrsta með hljómsveitinni Dr. Gunni síðan prjál-útgáfan „Í sjoppu“ kom út 2015, og fyrsta alvöru platan síðan „Stóri hvellur“ kom út 2003. Auk Gunnars Hjálmarssonar skipa Guðmundur Birgir Halldórsson, Grímur Atlason og Kristján Freyr Halldórsson sveitina.