Þátturinn Rotterdam kallar var sýndur á RÚV í gær en í honum er fylgst með Daða og Gagnamagninu í Rotterdam. Þau eru þar nú að undirbúa sig fyrir Eurovision en þau stíga fyrst á svið á fimmtudaginn 20. maí.
Það vakti athygli borðspilaáhugamanna að hópurinn virtist hafa tekið með sér haug af borðspilum en það mátti sjá glitta í þau í bakgrunninum á þættinum. Skjáskot úr þættinum var birt í hópnum „Borðspilaspjallið – Umræður um áhugamálið“ þar sem spurt var hvaða spil þetta eru sem þau hafa með sér.
Það tók glögga spilaáhugamenn ekki langan tíma að átta sig á því hvaða spil var um að ræða. Þetta eru spilin Ticket to Ride: Amsterdam, Stafavíxl, Sprengjuspilið, Heckmech, Svarti Sauðurinn og Taco, köttur, geit.
Það er ljóst að þau hafa nóg að gera þegar þau eru ekki að æfa sig fyrir keppnina en skuli þau komast áfram úr undankeppninni keppa þau á úrslitakvöldinu sem haldið er laugardaginn 22. maí. Ísland situr nú í fjórða sæti veðbanka en aðeins Ítalía, Frakkland og Malta eru fyrir ofan okkur í augnablikinu.
