Bergur Ebbi Benediktsson var gestur í Brennslunni á FM957 í morgun. Rikki G, einn þáttarstjórnanda Brennslunnar, tók hann í yfirheyrslu þar sem ýmiss mál voru rædd, til dæmis hvaða eiginleika fólks Bergur Ebbi þolir ekki og hvaða stjörnu hann var skotinn í þegar hann var yngri.

Þegar Rikki spurði Berg út í hver leiðinlegasti samfélagsmiðilinn væri tók Bergur á rás og fór að bera saman eiturlyf og samfélagsmiðla. Hann segir Facebook vera eins og bjór.

„Það er svona frekar basic, en þú færð hausverk ef þú ert of mikið á því og það er kannski ekkert það geðveikt. Twitter er heróín. Þú ánetjast því og verður drullusama um allt annað í lífinu,“ sagði Bergur og viðurkenndi að hann væri sjálfur háður netheróíninu sem Twitter er.

Hann segir fólk á Twitter vera sinnulaust um umhverfi sitt. Það geri grín af öllu og hafi enga skoðun á neinu. Næst miðillinn til að fá útreið frá Bergi var Instagram.

„Instagram er kókaín. Það sviptir fólk sjálfsvirðingu og gerir það mjög hratt,“ sagði Bergur og við það misstu þáttarstjórnendur sig úr hlátri.

Við þetta ákvað Rikki G að loka umræðunni þar sem að hans sögn var ekki hægt að toppa þessi orð Bergs Ebba.