Þau sem halda framhjá eru misgóð í að halda því leyndu. Stundum þarf ekki meira en ljósmynd til að koma upp um hliðarsporið. Eins og maðurinn sem sendi eiginkonu sinni tvær speglamyndir frá hótelherbergi og er nú einhleypur.

Tylar Paige deilir sögunni af því hvernig hún komst að því að eiginmaður hennar var henni ótrúr.

Hún greinir frá þessu í myndbandi á TikTok.

„Ég sá myndir af eiginmanni mínum á Facebook. Hann var á skemmtistað með fullt af konum og var ekki með giftingarhringinn sinn.“ Myndirnar voru á Facebook-síðu skemmtistaðarins.

Tylar spurði eiginmann sinn út í myndina. „Hann sagði að skemmtistaðurinn hefði „photoshoppað“ hringinn hans í burtu. Já einmitt,“ segir hún og hlær.

„Eftir að hann áttaði sig á því að hann væri giftur „photoshop“ sérfræðingi og að enginn ljósmyndari á skemmtistað myndi eyða tíma í að fjarlægja hring af einhverri mynd þá breyttist sagan. Hann sagði að hann hlyti að hafa tekið hringinn af sér þegar hann þvoði sér um hendur og gleymt að setja hann aftur á. Mjög hentugur tími til að gleyma því að setja á sig giftingarhringinn.“

Tylar sagði þetta vera „fáránlegustu lygi“ sem hún hafi heyrt. Hún skildi við eiginmann sinn og er í dag einhleyp.