Nokkrir leikir fóru fram í A-deild Lengjubikars karla og kvenna í dag.
Fylkismenn fengu Leiknismenn í heimsókn en Leiknir komst upp í Pepsi Max-deildina í sumar. Eina mark leiksins var skorað af fyrirliða Leiknis, Sævari Atla Magnússyni, á 71. mínútu leiksins. Aðeins fjórum mínútum seinna fékk Dagur Austmann Hilmarsson, leikmaður Leiknis, sitt annað gula spjald og var vikið af velli. Það kom ekki að sök og tóku Leiknismenn öll stigin með sér yfir Elliðaárnar.
Bæði Akureyrar-liðin spiluðu fyrir sunnan í dag. Þórsarar fengu 4-0 skell í boði FH inni í Skessunni. Mörk frá Einari Erni Harðarsyni og Matthíasi Vilhjálmssyni þýddu að Hafnfirðingar leiddu leikinn 2-0 þegar gengið var til búningsherbergja. Þórir Jóhann Helgason og Vuk Oskar Dimitrijevic skoruðu síðan sitthvort markið í seinni hálfleik og þægilegur sigur innsiglaður.
KA-menn stóðu sig öllu betur þegar þeir mættu Aftureldingu í Mosfellsbænum. Þeir komu boltanum sjö sinnum í mark Aftureldingar en Daníel Hafsteinsson og Brynjar Ingi Bjarnason skoruðu báðir tvö mörk fyrir Akureyringa. Jonathan Hendrix skoraði sitt annað mark í þremur leikjum og skoruðu Hallgrímur Mar Steingrímsson og Steinþór Freyr Þorsteinsson einnig eitt mark hvor. Valgeir Árni Svansson skoraði eina mark Aftureldingar og fóru leikar því 7-1, KA-mönnum í vil.
Íslandsmeistarar Vals fengu HK í heimsókn á Origo-völlinn. Kaj Leo í Bartalsstovu skoraði fyrsta mark leiksins á 39. mínútu og var það eina mark fyrri hálfleiks. Orri Sigurður Ómarsson tvöfaldaði forrystu heimamanna á 55. mínútu og virtist þetta ætla að enda með þægilegum sigri Valsara. Stefan Alexander Ljubicic var þó ekki sammála því og minnkaði hann muninn úr vítaspyrnu á 73. mínútu, aðeins átta mínútum eftir að hann kom inn á sem varamaður. Hann var síðan aftur á ferðinni á 87. mínútu þegar hann jafnaði leikinn og endaði leikurinn með 2-2 jafntefli.
KR mættu Kórdrengjum í Vesturbænum og voru þeir ekki lengi að skora fyrsta markið. Á níundu mínútu kom Grétar Snær Gunnarsson KR yfir en ekkert fleira gerðist fyrr en á 75. mínútu þegar Ægir Jarl Jónasson skoraði og kom Vesturbæingum í 2-0. Oddur Ingi Bjarnason skoraði síðan þriðja mark KR á 88. mínútu áður en Þórir Rafn Þórisson minnkaði muninn í uppbótartíma. 3-1 sigur KR.
Kvennamegin buðu Tindastóll og FH-ingar upp á markaveislu á Sauðárkróki. Elín Björg Símonardóttir og Esther Rós Arnarsdóttir skoruðu báðar fyrir gestina á innan við korteri en stuttu seinna minnkaði Bryndís Rut Haraldsdóttir muninn fyrir Sauðkrækinga. Það dugði þó skammt því aðeins þremur mínútum eftir mark Bryndísar var Brynhildur Brá Gunnlaugsdóttir búin að koma FH-ingum í 3-1. Áður en flautað var til hálfleiks skoraði Murielle Tiernan fyrir Tindastól og staðan því 2-3 í hálfleik. Markagleði liðanna hélt áfram í hálfleik og skoraði Elísa Lana Sigurjónsdóttir snemma í seinni hálfleik fyrir FH-inga og bætti Elín Björg síðan við sínu öðru marki. Krista Sól Nielsen og María Dögg Jóhannesdóttir klóruðu í bakkann fyrir Tindastól en það dugði ekki og sigruðu Hafnfirðingar flottan 5-4 sigur.
ÍBV mætti til Keflavíkur og rétt naumlega töpuðu leiknum. Ragna Sara Magnúsdóttir varð fyrir því óláni að skora sjálfsmark á 26. mínútu og var það eina mark fyrri hálfleiks. Því leiddu Keflvíkingar í hálfleik 1-0. Thelma Sól Óðinsdóttir jafnaði metin fyrir Eyjakonur í byrjun seinni hálfleiks en Natasha Moraa Anasi skoraði sigurmark Keflvíkinga á 89. mínútu. Naumur en góður 2-1 sigur staðreynd.
