Sænska ríkisútvarpið segir að lögreglunni hafi verið tilkynnt að ráðist hefði verið á fólki í Bangårdsgatan í Vetlanda um klukkan 15 í gær. Árásarmaðurinn var sagður vera vopnaður stunguvopni.
Þremur mínútum eftir að fyrstu lögreglumenn komu á vettvang voru kennsl borin á árásarmanninn sem er á þrítugsaldri. Hann er sagður hafa komið við sögu lögreglunnar áður fyrir smávægileg brot. Aftonbladet segir að hann hafi komið til Svíþjóðar fyrir nokkrum árum og búið í landinu síðan.
Sænska ríkisútvarpið segir að rannsókn lögreglunnar beinist að morðtilraun og hryðjuverki og að hún hafi upplýsingar sem bendi til að um hryðjuverk hafi verið að ræða. Lögreglan hefur þó ekki viljað skýra frá hvaða upplýsingar það eru.
Þrír eru í lífshættu, tveir eru alvarlega særðir, tveir töluvert særðir og einn er með minniháttar áverka að sögn lögreglunnar.
Árásarmaðurinn er á sjúkrahúsi þar sem lögreglan gætir hans.
