Fjallað er um morðið í Rauðagerði í albanska fjölmiðlinum Politiko. Frétt birtist þar fyrir tveimur dögum í þeim hluta miðilsins þar sem birtast fréttir á ensku.

Fréttin er að mestu í samræmi við þróun rannsóknarinnar eins og henni var lýst í fjölmiðlum fyrir tveimur dögum, þegar frekari handtökur og yfirheyrslur hófust. Í fréttinni segir meðal annars að Armando Bequiri, sem myrtur var fyrir utan heimili sitt, síðastliðið laugardagskvöld, hafi verið ákafur stuðningsmaður íslenska landsliðsins í knattspyrnu.

„Grunur leikur á að morðið hafi verið framið vegna ósættis varðandi fíkniefnaviðskipti, jafnvel þó að hinn myrti hafi verið búsettur í Reykjavík í sjö ár, þar sem hann hafði byrjað nýtt líf, langt frá vandræðum,“ segir um Armando.

Tekið skal fram að íslenska lögreglan hefur ekki staðfest að morðið tengist fíkniefnaviðskiptum en fjölmiðlar hafa gert því skóna. Þá segir ennfremur um Armando:

„Hann var með íslenskan ríkisborgararétt og hafði stofnað fyrirtæki sem starfar að öryggisgæslu en sem mikill knattspyrnuáhugamaður var hann ákafur stuðningsmaður íslenska knattspyrnulandsiðsins.“

Í fréttinni er morðinu lýst eins og það hefur birst í íslenskum fjölmiðlum.