„Það setti að mér ugg við að lesa fréttir af þessu máli. Þetta ber öll merki þess að hafa verið aftaka í ósköp dæmigerðu íbúðahverfi í Reykjavík. Svo getur þetta hafa verið eitthvað persónulegt á milli geranda og þolanda. Við eigum eftir að fá meiri upplýsingar um hvernig þeir tengjast og hvort þeir tengjast skipulagðri glæpastarfsemi. Þetta þurfum við að vita til að sjá heildarmyndina,“ hefur Morgunblaðið eftir Helga Gunnlaugssyni, afbrotafræðingi og prófessor við Háskóla Íslands, um málið.
Hann tók fram að hann viti ekki meira um málið en það sem lögreglan og fjölmiðlar hafa skýrt frá. Haft er eftir honum að ef grunsemdir lögreglunnar séu réttar þá sé þetta svipað því sem gerst hefur erlendis. Hann nefndi þar Norðurlöndin til sögunnar en þar geisa átök glæpagengja þar sem tekist er á um viðskipti og svæði. „Þetta gæti hafa verið angi af slíkri baráttu eða uppgjöri,“ sagði Helgi.
Hann benti einnig á að lögreglan hafi lengi varað við hættu af þessu tagi og það hafi greiningardeild ríkislögreglustjóra einnig gert. „Þetta var við dyrastafinn hjá okkur og tímaspursmál hvenær það kæmi hingað. Það fyrsta sem mér datt í hug þegar ég las um manndrápið í Rauðagerði var hvort svona átök og uppgjör væru komin hingað,“ sagði Helgi.
Hann benti á að mjög grófu ofbeldi hafi verið beitt við handrukkanir hér á landi og dæmi séu um að þeim hafi lokið með manndrápi en það sé nýtt að skotvopni sé beitt með þessum hætti, eins og við aftöku. „Það vekur manni mikinn ugg. Ef það er rétt sem lögreglan telur sig hafa vísbendingar um óttast maður að þessu verði svarað með einhverjum hætti. Að það geti orðið hefndaraðgerðir,“ sagði hann og tók einnig fram að ef um morð af persónulegum ástæðum sé að ræða telji hann minni líkur á hefndaraðgerðum.
