„Það færist í vöxt að vilja úthýsa þeim sem hafa hættulegar, rangar, óskynsamlegar eða jafnvel bara heimskulegar skoðanir.“
Þetta segir Haukur Örn Birgisson lögmaður í bakþönkum Fréttablaðsins í dag. „Smátt og smátt eru skoðanirnar og fólkið sem þær hefur úthrópað, svívirt, smánað og bannfært. Þetta verður æ algengara og eðlilegra með hverju árinu sem líður. Við hættum að malda í móinn og samþykkjum útskúfunina svo lengi sem hún beinist ekki að okkur sjálfum.“
Haukur segir að sumt af þessu virðist vera saklaust og nefnir dæmi um sígaretturnar sem hafa nýlega verið fjarlægðar af auglýsingaskiltum og umbúðum. „Sígaretta er fjarlægð úr munnviki Bubba Morthens utan á Borgarleikhúsinu. Bjórdósir með mynd af reykingamanni eru fjarlægðar úr Vínbúðunum. Maður getur þó varla annað en brosað yfir íroníunni í því að ríkið banni ljósmynd af reykjandi manni utan á áfengisdós, í ríkisverslun sem selur einungis áfengi og tóbak.“
Næst bendir Haukur á að svona getur undið upp á sig. „Fólki sem gagnrýnir sóttvarnareglur eru gerðar upp annarlegar hvatir og sjálfur forseti Bandaríkjanna er látinn hverfa sporlaust af samfélagsmiðlum. Nú ætla alþingismenn að setja fólk, sem talar heimskulega um Helförina, í tveggja ára fangelsi,“ segir hann.
„Tjáningarfrelsið sjálft á undir högg að sækja“
Haukur segir síðan hver afleiðingin af öllu þessu verður. „Í nafni umburðarlyndis og manngæsku stígur fram fólk, með ríkari réttlætiskennd en aðrir, sem vill hafa vit fyrir hinum. Það virðist þekkja betur en aðrir hvaða skoðanir eru rangar og segja skerðingarnar nauðsynlegar til verndar þeim sem eiga undir högg að sækja. Afleiðingin er sú að tjáningarfrelsið sjálft á undir högg að sækja.“
Að lokum segir hann að það þurfi að verja tjáningarfrelsið. „Ótal margir hafa óæskilegar skoðanir, en rétt þeirra til þess að tjá þær þarf að verja fram í rauðan dauðann. Í tjáningarfrelsinu felst nefnilega einnig rétturinn til þess að hafa rangt fyrir sér. Að standa vörð um tjáningarfrelsið, felur í sér að standa vörð um réttinn sjálfan en ekki skoðanirnar.“
