Dagsetning er nú komin á aðalmeðferð í máli gegn Hamborgarabúllu Tómasar og skyldum aðilum en nokkrir fjölmiðlar hafa fjallað um málið fyrr í haust. Ákæran snýst um ólöglegan innflutning á kjöti og peningaþvætti vegna þess að ávinningur var nýttur af hinum meintu brotum. Ákæran var gefin út um miðjan janúar á þessu ári.
Aðalmeðferð í málinu verður við Héraðsdóm Reykjavíkur þann 19. janúar 2021. DV hefur ákæruna undir höndum en ákærðu eru starfsmaður fyrirtækisins, sem er kona á miðjum aldri, Hamborgarabúlla Tómasar ehf og TBJ (Tommi´s Burger Joint). Forsvarmaður Hamborgarabúllunnar og TBJ er Ingvi Týr Tómasson.
Ákæran snýst um að félögin og starfsmaðurinn hafi flutt inn nautakjöt á röngu tollnúmeri og borgað lægri tolla af því en reglur kveða á um. Afleitt meint brot af þessu varðar peningaþvætti, þar sem fyrirtækið hafi nýtt ávinninginn af hinum ólöglega innflutningi.
Í ákæru segir að aðilarnir hafi í átta tilvikum innflutnings á nautakjötsafurðum frá Bretlandi veitt tollyfirvöldum rangar eða villandi upplýsingar um tegund hluta afurðanna, nánar tiltekið frosna nautaframparta, með því að koma því til leiðar að tollmiðlari sem sinnti tollskjalagerð í umboði félaganna tilgreindi þær í öllum tilvikum ranglega á aðflutningsskýrslum fyrir tollafgreiðslu undir röngu tollskrárnúmeri, sem kjöt með beini, þegar um var að ræða beinlaust kjöt.
Samkvæmt ákæru var ávinningur af þessum brotum tæplega 20 milljónir. Lögmaður Hamborgarabúllunnar hefur látið hafa eftir sér að mistök hafi verið gerð við útfyllingu á tollskýrslum. Kjötið hafi verið fyrir misskilning fært í rangan tollflokk og þar sem ekki hafi verið gerðar athugasemdir fyrst þegar kjötið var flutt inn hafi starfsmaðurinn sem er meðal ákærðra aðila staðið í þeirri trú að tollskýrslurnar væru rétt útfylltar.
Í peningaþvættishluta ákærunnar er starfsmaðurinn ákærður fyrir peningaþvætti upp á tæplega 8 milljónir og TBJ félagið og starfsmaðurinn eru að auki ákærð saman fyrir peningaþvætti upp á rúmlega 8,6 milljónir.
Krafist er þess að starfsmaðurinn sem fyllti skýrslurnar rangt út verði dæmd til refsingar og greiðslu alls sakarkostnaðar.
Hins sama er krafist varðandi félögin tvö, TBJ og Hamborgarabúllu Tómasar.
Stofnandi Hamborgarabúllunnar er hinn víðfrægi Tómas Tómasson, alltaf kallaður Tommi. Búllan er orðin að alþjóðlegri keðju með nokkra sölustaði hérlendis og í hinum ýmsu löndum, Englandi, Þýskalandi og Ítalíu. Tekið skal fram að Tommi sjálfur hefur enga aðkomu að þeim málum sem snerta þessa ákæru.
