Hér er hún komin, brakandi fersk stjörnuspá fyrir vikuna. Hvað segja stjörnurnar um næstu viku ?

Vikan 09.10. – 15.10.

Hrútur
21. mars–19. apríl

Hrúturinn er óvenjuvel upplagður til að takast á við áskoranir vikunnar. Viðmót hans er jákvætt og skemmtilegt og smitar út frá sér. Orka sem er vel þegin inn í komandi vikur. Hann kemur jafnvel sjálfum sér á óvart með þessari Pollýönnu-hegðun.

Naut
20. apríl–20. maí

Það sem liggur þér helst á hjarta þessa vikuna er að einhver náin/n þér sjái þín sjónarmið og sé þér samtaka í næstu skrefum fram á við. Þá er helsta ráðið að opna sig og ræða málin. Kannski væri sniðugt fyrir ykkur að prófa eitthvað nýtt saman.

Tvíburar
21. maí–21. júní

Þú fagnar breyttum aðstæðum í vinnunni og lítur það jákvæðum augum. Mögulega var þörf á smá breytingu, eða tíma til þess að sinna öðrum málum sem hafa safnast upp heima við. Þú ert allavega pollróleg/ur miðað við allt sem gengur á.

Krabbi
22. júní–22. júlí

Krabbinn er endalaust hvattur eða í raun neyddur til að hugsa út fyrir kassann. Breytt fyrirkomulag hefur leitt hann í þessar aðstæður en hann má vera stoltur af útsjónarseminni. Hún er til fyrirmyndar!

Ljón
23. júlí–22. ágúst

Það virðist vera þitt hlutverk þessa vikuna að láta öðrum líða vel og sannfæra þá um að það verði allt í lagi. Þetta hlutverk getur dregið úr manni til lengdar, en ljónið er vel upplagt og nýtur þess að hjálpa sínum nánustu.

Meyja
23. ágúst–22 .sept

Já, þetta eru svo sannarlega yfirþyrmandi tímar. Mundu bara, elsku Meyja, að þú ert ekki ein í þessum aðstæðum. Æfðu þig í þakklæti, þakkaðu fyrir litlu hlutina í lífinu. Sú æfing mun hjálpa þér að sjá allt í réttu samhengi og gleðja þig.

Vog
23. sept–22. okt

Vogin er einstaklega góð í því að vera sálfræðingur allra og oft jafnvel óumbeðin. Hún er klók með ýmis góð ráð, en stjörnurnar minna hana á að hlusta sjálf á þessi ráð sem hún veitir öllum öðrum.

Sporðdreki
23. okt–21. nóv

Þín áskorun er á persónulegri nótunum. Þú berst við ávana sem þú veist upp á hár að gerir þér ekkert gott. Hvað er það sem þú þarft að sleppa tökum á? Gefðu þér tíma til að íhuga þessa spurningu.

Bogmaður
22. nóv–21. des

Það er aðdáunarvert hversu uppátækjasöm/amur þú ert. Þú fylgir innsæi þínu meira en þú gerir þér grein fyrir og tekur áhættu, innst inni veistu að það er rétt. Þú veist ekki nákvæmlega hvernig spilin munu leggjast en getur þó treyst því að þau verði þér í hag.

Steingeit
22. des–19. janúar

Einhver er að stíga inn í styrkleika sinn… Essasú? Fyndið hvernig einn dagur getur gjörbreytt stefnu manns, eða gefið manni stefnu, réttara sagt. Það er að skýrast betur hvert þú vilt stefna og hvernig þú ætlar að komast þangað. Spennandi tímar.

Vatnsberi
20. janúar–18. febrúar

Þú þarft aðeins að berjast fyrir þínu þessa vikuna. Ekki örvænta! Það mun enda farsællega, en verður klárlega æfing í að standa upp fyrir sjálfri/um sér og setja mörk. Það líður engum vel í þessum aðstæðum en það er þó sannarlega góð tilfinning að vera samkvæmur sjálfum sér.

Fiskar
19. febrúar–20. mars

Innri bylting og orkustraumsbreyting er í kortunum þínum. Loksins finnst þér eins og kosmósið sé þér hliðhollt og ekkert getur haldið aftur af þér. Enda hefur ýmislegt komið upp á og þetta ár verið þér afar lærdómsríkt. Nú dettur þú í uppskeruna.