Heilsudrottningin Sólveig Eiríksdóttir betur þekkt sem Solla Eiríks rekur vefverslunina HealthyDóttir.is með dóttur sinni Júlíu Ólafsdóttur. Þetta er ekki fyrsta verkefnið sem Solla vinnur með dóttur sínum en Solla og dóttir hennar Hildur halda úti matarblogginu Mæðgurnar á himneskt.is.

Einn þeirra vara sem vekur áhuga á sölusíðu Sollu og Júlíu er tunguskafa. Slíkar sköfur hafa verið notaðar í árhundruð sem hluti af klassísku hreinsunarrituali í jógafræðunum að sögn Sollu.

„Pabbi minn Eiríkur mælti með að ég ætti alltaf tvo tannbursta þegar ég var lítil, annan til að bursta tennurnar og hinn til að bursta tunguna. Svo þegar ég fór á jóganámskeiðið í köben 1980 þá kynnt jógakennarinn okkur fyrir sköfunni og sagði okkur hvað hún gerði,“ segir Solla sem stundar tungusköfun alla daga.

„Jógakennarinn sagði okkur að það að skafa tunguna væri að hans mati alveg jafn mikilvægt og að bursta tennurnar. Sérstaklega væri mikilvægt að skafa tunguna á morgnana því tungan safnaði úrgangsefnum yfir nóttina sem part af eðlilegri hreinsun og þá værum við að fjarlægja þau með sköfunni. Þetta hef ég gert í nær 40 ár og er löngu orðin háð,“ segir Solla og brosir sínu glóandi brosi.