Guðmundur Franklín Jónsson, forsetaframbjóðandi, segir að ummæli sín úr útvarpsþætti á Útvarpi Sögu frá árinu 2018, sem dreift hefur verið á samfélagsmiðlum undanfarið, séu tekin úr samhengi.
Jæja-hópurinn hefur deilt ummælum Guðmundar úr þættinum hvar hann sagði:
„Ég myndi ekkert segja nei á móti því að hjálpa manni að stela undan skatti heimaríkis, það er í raun mín skylda sem starfsmaður banka [..] ég get bent þér á margar aðferðir hvernig á að stela heilu milljörðunum án þess ég blikni.“
Með deilingu Jæja-hópsins fylgir texti þar sem Guðmundur er sakaður um að láta það sér í léttu rúmi liggja að svíkja undan skatti, meðan hann leggi sjálfur áherslu á að berjast gegn spillingu í forsetaframboði sínu.
Þá er Guðmundur sagður hafa kostað skattgreiðendur hundruð milljóna vegna aðkomu sinnar að fyrirtækjarekstri:
„Kapítalistinn Guðmundur Franklín hefur kostað skattgreiðendur og lífeyrissjóði landsins hundruð milljóna undanfarna áratugi. Hann er ekki að fara að taka á spillingunni heldur virðist hann þvert á móti ekki sjá neitt að því að fyrirtæki og kapítalistar svíkist undan skatti og láti hundruð milljóna falla á almenning og eftirlaunafólk vegna fjármálabrasks. Sem dæmi má nefna fiskvinnslu á Vestfjörðum, Rauða herinn, sem fór á hausinn seint á tíunda áratugnum og endaði í mörg hundruð milljóna tapi sem skattgreiðendur tóku á sig. Burnham á Íslandi sem lífeyrissjóðir töpuðu hundruð milljóna á, en í stjórn þess fyrirtækis sat Bjarni Benediktsson fjármálaráðherra. Þessi tvö mál eru aðeins toppurinn á ísjakanum.“
Eyjan heyrði í Guðmundi og spurði hann út í þessi ummæli hans:
„Ég mæli með að fólk hlusti á þáttinn. Þetta er góður þáttur. En auðvitað er þetta allt tekið úr samhengi og að sjálfsögðu er ég ekki að hvetja til þess að fólk svíki undan skatti. Framsetningin á þessu finnst mér fyrir neðan allar hellur. Þetta eru falsfréttir, eins og þetta er sett fram þarna, það er ekkert annað nafn yfir þetta,“
sagði Guðmundur og ráðlagði fólki að hlusta á þáttinn til að geta dæmt sjálft um hvernig í málinu lægi.
Guðmundur undraðist einnig að Lára Hanna Einarsdóttir, stjórnarmaður Í RÚV fyrir hönd Pírata, væri að dreifa viðtalinu við sig ásamt gagnrýni á sig persónulega, en Lára deildi viðtalinu árið 2018 og aftur nú í vikunni með eftirfarandi orðsendingu:
„Ég sá að Fb vinur var að deila þessu næstum tveggja ára innleggi. Rifjaði upp og ákvað að deila því líka þar sem þessi maður
ætlar að bjóða sig fram til forseta á Íslandi. Ótrúlegur andskoti.“
Þá gagnrýnir Lára einnig önnur ummæli Guðmundar, varðandi meintar hótanir hans gegn starfsfólki RÚV, sem Eyjan greindi frá um helgina. Lára segir sálartetur Guðmundar saurugt:
„Eitt fyrirlitlegasta einkenni Donalds Trump eru hans eilífu hótanir og hefndaraðgerðir. Hann ímyndar sér ‘óvini’ með hjálp Fox, hótar þeim hefndum í tísti og níðir og rægir mann og annan endalaust. Íslenskur forsetaframbjóðandi, sem hefur árum saman rægt og logið um Ríkisútvarpið og dásamað Trump á Útvarpi Sögu, hótaði starfsfólki RÚV þessu – að mér skilst í gær:
„…og hef ég stóra vopnageymslu af upplýsingum um allt þetta fólk og hika ekki við að nota ef þörf krefur.“
Þetta sýnir að sálartetur frambjóðandans er saurugt og fyrirlitlegt og að hann eigi nákvæmlega ekkert erindi í ábyrgðarstöður. Ekki frekar en Trump,“
sagði Lára Hanna.