,,Þetta er kargaþvæla, Gaui er alltaf að fara að spila,“ sagði Kári Ársælsson, fyrrum fyrirliði Breiðabliks þegar hlaðvarpsþátturinn Dr. Football fór yfir lið Breiðabliks fyrir sumarið í Pepsi Max-deildinni. Búist er við að deildin fari af stað 13 júní.

Rætt var um hvort Guðjón Pétur Lýðsson, yrði í byrjunarliði Breiðabliks eða ekki. Óskar Hrafn Þorvaldsson er með gríðarlega breidd á miðsvæðinu og ljóst að stór nöfn klæða sig í úlpuna og setjast á bekkinn

,,Hann er þannig að gæi að hann vill spila, þetta er einstakur gæi í íslenskum fótbolta. Hvað gerist ef hann er ekki í liðinu?,“ sagði Hjörvar og Kári var fljótur til svars.

„Hann vinnur sig inn í liðið. Hann verður ósáttur á bekknum, brjálaður en það bitnar ekki á hópnum eða liðinu.“

Hjörvar sló þá á létta strengi og sagðist vilja myndavélar í Smárann ef Guðjón verður ekki í liðinu. „Ef Gaui verður ekki í liðinu þá vil ég raunveruleikaþátt í Smáranum.“