Benedikt Sveinsson faðir Bjarna Benediktssonar forsætisráðherra, er einn þeirra sem skrifaði undir umsókn Hjalta Sigurjóns Haukssonar um uppreist æru. Erfitt hefur reynst fyrir fjölmiðla að fá upplýsingar um þá sem hafa sett nöfn sín á þau skjöl.
Benedikt hefur nú sent frá sér yfirlýsingu sem birt er á RÚV og segir Hjalta hafa leitað til sín. Hjalti segir í samtali við DV að hann og Benedikt séu góðir vinir og hann hafi meðal annars starfað hjá fyrirtæki hans. Benedikt kveðst líta svo á að uppreist æra sé lagalegt úrræði fyrir dæmda brotamenn til að öðlast borgaraleg réttindi á ný.
„Sá hugur bjó ekki að baki að rétta stöðu Hjalta gagnvart fórnarlambi hans. Hjalta hef ég sagt að horfast í augu við gjörðir sínar og iðrast þeirra. Það sem átti hér að vera lítið góðverk við dæmdan mann hefur snúist upp í framhald harmleiks brotaþola. Á því biðst ég enn og aftur afsökunar.“