Lögreglan á höfuðborgarsvæðinu fékk tilkynningu um líkamsárás og eignaspjöll rétt fyrir klukkan eitt í nótt. Þarna höfðu þrír til fjórir ungir piltar bankað upp á hjá íbúa í kjallara húss í Hlíðunum. Þegar húsráðandi kom til dyra veittust þeir að honum og við það brotnaði rúða. Strákarnir hlupu síðan á brott.
Ekki kemur fram í skeyti lögreglu hvort piltarnir hafi fundist eða hvort húsráðandi hafi hlotið einhverja áverka.
Skömmu síðar var tilkynnt um þjófnað á leigukerru frá bensínstöð í Seljahverfi. Að því er segir í skeyti frá lögreglu sá ökumaður þegar menn reyndu að stela umræddri kerru og elti hann þjófana sem óku af vettvangi með kerruna. Þjófarnir urðu varir við eftirförina, stöðvuðu bifreiðina og losuðu sig við kerruna. Þeir óku síðan á brott og náðust ekki.
Nokkur önnur mál komu inn á borð lögreglu í gærkvöldi og í nótt. Á fimmta tímanum var tilkynnt um ofurölvi erlendan mann í miðborginni. Hann gat ekki gert grein fyrir því hvar hann byggi og var hann sökum veðurs vistaður í fangageymslu lögreglu meðan hann sefur úr sér. Þessu til viðbótar voru nokkrir stöðvaðir í umferðinni sem ýmist eru grunaðir um akstur undir áhrifum áfengis eða fíkniefna.