„Trump og menn hans hafa lagt sig fram um að kynna ákæruna og málssókn demókrata sem flokkspólitískt útspil – sama segir Þórhildur Sunna um bréf Ásmundar Friðrikssonar til Strassborgar.“

Þetta segir Björn Bjarnason, fyrrverandi þingmaður og ráðherra Sjálfstæðisflokksins til margra ára, í pistli á heimasíðu sinni.

Þar fer hann yfir tvö helstu fréttamál vikunnar hér á landi á vettvangi stjórnmála; bréf Ásmundar Friðrikssonar til Evrópuráðsþingsins þar sem hann vakti athygli á broti Þórhildar á siðareglum þingmanna og þá staðreynd að Donald Trump hafi verið ákærður af fulltrúadeild Bandaríkjaþings.

„Forsetinn og menn hans hafa lagt sig fram um að kynna ákæruna og málssókn demókrata sem flokkspólitískt útspil þeirra sem þola ekki að tapa kosningum.

Demókratinn Nancy Pelosi, forseti fulltrúadeildarinnar, hefur í hendi sér hvenær hún sendir ákæruna til öldungadeildarinnar sem dæmir í málinu. Talið er víst að niðurstaðan þar verði eftir flokkslínum og meirihlutinn, repúblíkanar, sýkni forsetann,“ segir Björn.

Hann segir að Trump hafi ekki leynt reiði sinni yfir ákærunni. „Hann talar svo niðurlægjandi til demókrata að minnir helst á skammirnar sem Björn Leví Gunnarsson, þingmaður Pírata, lét dynja á Ásmundi Friðrikssyni, þingmanni Sjálfstæðisflokksins, fyrir að „leyfa sér“ að vekja athygli Liliane Maury Pasquier, forseta þings Evrópuráðsins í Strassborg, á að Þórhildur Sunna Ævarsdóttir, flokkssystir Björns Levís, hefði fyrst íslenskra þingmanna gerst brotleg við siðareglur alþingismanna.“

Björn segir að það sé réttur Ásmundar að upplýsa forseta Evrópuráðsþingsins um álit siðanefndar. Bendir hann á að Þórhildur Sunna hafi orðið formaður Íslandsdeildar Evrópuráðsþingsins árið 2017 og kosningu sem formaður laga- og mannréttindanefndar þingsins. Segir Björn að tilkynningarskylda um þetta á vettvangi Evrópuráðsþingsins hafi hvíld á Þórhildi sjálfri, „ekki síst sem eindregnum talsmanni gagnsæis og ábyrgðar“ eins og Björn orðar það.

„Þórhildur Sunna brást á hinn bóginn mjög illa við fréttinni um tilkynningu Ásmundar og valdi þá leið að setja hana í stórt pólitíski samhengi eins og Donald Trump gerir vegna ákærunnar gegn sér. Slíkar yfirlýsingar hafa vafalaust áhrif á einhverja en þær breyta ekki efni málsins: ákæra hvílir á Trump og Þórhildur Sunna braut siðareglur alþingismanna. Undan staðreyndum verður ekki vikist með stóryrðum.“