Kerri-Ann Conley, 27, hefur verið ákærð fyrir að hafa orðið ungum dætrum sínum að bana. Þær létust þegar þær voru skildar eftir í bíl þegar mjög heitt var í veðri. Conley er fyrsta manneskja sem er ákærð fyrir morð samkvæmt nýju ákvæði hegningarlaga í Queensland í Ástralíu en ákvæðið víkkar skilgreininguna á hvað telst morð.

Sky skýrir frá þessu. Fram kemur að dætur Conley, þæar Chloe-Ann eins árs og Darcey-Helen tveggja ára, hafi fundist látnar í bíl við heimili þeirra í Brisbane á laugardaginn. Hitinn var þá 31 gráða. Móðir þeirra var handtekin skömmu eftir að stúlkurnar létust.

Samkvæmt fréttum ástralskra fjölmiðla hljóp Conley með stúlkurnar inn í hús og reyndi að kæla þær eftir að hún tók þær úr bílnum. Lögregla og sjúkralið komu á vettvang og voru stúlkurnar úrskurðaðar látnar á vettvangi.

Talsmaður lögreglunnar segir að svo virðist sem stúlkurnar hafi verið í gríðarlegum hita. Um hörmulegan atburð sé að ræða.

Fjölskyldan var þekkt hjá barnaverndaryfirvöldum.

Conley er einnig ákærð fyrir vörslu fíkniefna. Hún kemur fyrir dóm 11. desember.