Lögreglan á höfuðborgarsvæðinu handtók 8 ökumenn í gærkvöldi og nótt en þeir eru allir grunaðir um að hafa ekið undir áhrifum áfengis og/eða fíkniefna. Ökumaður sem lögreglumenn höfðu afskipti af í gærkvöldi reyndist vera sviptur ökuréttindum og fékk hann því ekki að halda för sinni áfram. Einn ökumaður var kærður fyrir að aka á 116 km/klst á Miklubraut í gærkvöldi en leyfður hámarkshraði þar er 60 km/klst.

Tveir hinna handteknu ökumanna reyndust ekki hafa endurnýjað ökuréttindi sín. Sá þriðji reyndist hafa verið sviptur ökuréttindum áður og var með röng skráningarnúmer á bifreiðinni sem hann ók. Sá fjórði reyndist einnig hafa verið sviptur ökuréttindum áður. Sá fimmti er grunaður um vörslu fíkniefna auk þess að hafa ekið undir áhrifum fíkniefna.

Á þriðja tímanum var tilkynnt um eignaspjöll í vesturbæ Reykjavíkur. Þar hafði einhver/einhverjir fengið útrás fyrir aumar og annarlegar hvatir og brotið allar rúður í bifreið sem var lagt í bifreiðastæði.