Um miðjan dag í gær var lögreglunni á Suðurlandi tilkynnt um undarlegan hlut á floti á sunnanverðu Þingvallavatni, nærri Villingavatni. Lögreglan fór á vettvang ásamt björgunarsveitum og fljótlega fannst eins manns kajak. Kajakinn var uppblásinn og með honum flaut bakpoki.
Þegar lögreglan skoðaði bakpokann nánar kom það í ljós að eigandi hans er erlendur ferðamaður sem hafði gist á tjaldsvæðinu á Þingvöllum nóttina áður. Leitað var á vatninu og í krinum það til klukkan 22 og var leit haldið áfram nú í morgun um klukkan 9.
Björgunarsveitir og þyrla Landhelgisgæslunnar leituðu í gær og munu halda því áfram í dag.
Lögreglan er að vinna í því að fá upplýsingar frá aðstandendum ferðamannsins varðandi ferðaáætlanir og plön og nýtur við það aðstoð utanríkisþjónustu Utanríkisráðuneytisins.
Búist er við frekari upplýsingum varðandi málið frá Lögreglunni í dag.