Samdráttur í ferðaþjónustu er farinn að hafa mikil áhrif á sölu gistingar hjá hótelum víðsvegar um landið. Þannig vekur athygli að stórir aðilar á markaðnum bjóða upp mikla afslætti yfir hásumarið, bæði á afsláttarsíðum, eins og t.d. aha og Hópkaupum, og eins á samfélagsmiðlum. Hingað til hafa slíkir afslættir aðallega verið í boði á þeim tíma ársins sem minni umferð er. Þannig bjóða Íslandshótel upp á afslátt á fimm hótelum víða um land sem felur í sér gistingu fyrir tvo, morgunverðarhlaðborð og þriggja rétta kvöldverð fyrir 29.900 krónur. Sveitahótel Eldhesta, skammt frá Hveragerði, hefur boðið 44% afslátt á gistingu fyrir tvo, þriggja rétta kvöldverð, morgunverð og reiðtúr fyrir tvo. Pakkinn kostar núna 24.900 krónur. B59 Hótel í Borgarnesi býður sömuleiðis upp á gistingu fyrir tvo með morgunverði, ásamt aðgangi að heilsulind og morgunverði á 34.900 krónur. Hér er um að ræða 39% afslátt. Þetta eru aðeins nokkur dæmi af mörgum.
Umferð útlendinga í miðborg Reykjavíkur hefur verið talsvert minni í sumar, en undanfarin ár og virðist sem gjaldþrot WOW Air hafi haft meiri áhrif á ferðamannastrauminn en ætlað var. Á sama tíma standa yfir miklar framkvæmdir í miðborginni og víðar vegna nýrra hótela. Þar ber hæst stóra Marriott hótelið við Hörpu, þar sem verða um 250 hótelherbergi. Íslandshótel standa fyrir miklum framkvæmdum við Lækjargötu og Center Hotel eru að leggja lokahönd á nýtt og glæsilegt hótel rétt við Hlemm. Þar er einmitt opnunartilboð – rúmlega 50% afsláttur á gistingu í tvær nætur og kvöldverði og spa.
Heildarfjöldi greiddra gistinátta í maí dróst saman um 10,2% milli 2018 og 2019. Þar munar mestu um staði sem miðla gistingu í gegnum Airbnb og álíka síður þar sem fækkunin var 29%. Gistinætur á hótelum í maí voru rúmlega 308.000 talsins, sem er 3% fækkun frá sama mánuði árið áður. Herbergjanýting á höfuðborgarsvæðinu var 67,2% í maí.
Heimildir DV herma að titrings gæti víða yfir bókunarstöðunni, en algengt er að hótel í höfuðborginni nái um 90% nýtingu yfir sumartímann. Aukin samkeppni hefur leitt til verðlækkunar sem mörg hótel ráða illa við, enda eru þau skuldsett og þola illa sveiflur í gestafjölda. Staðan er þó enn alvarlegri víða um land, enda dvelja ferðamenn skemur en áður hérlendis og fara síður í lengri ferðir út á land.
