Ólafur Jóhannesson, þjálfari Vals, var sáttur með sína menn í kvöld í 1-0 sigri á Grindavík.

Óli Jó viðurkennir að sigurinn hafi ekki verið sá fallegasti en fagnar því að taka þrjú mikilvæg stig.

,,Þetta var ekki merkilegur leikur en stigin féllu okkar megin og ég er ánægður með það,“ sagði Óli.

,,Það var ekki mikið að gerast í þessum leik en við tróðum inn marki og það telur.“

,,Grindavík er með fínt lið og við vissum það fyrir leikinn. Það er allt erfitt hjá okkur núna.“

,,Þú tapar stundum í öllum íþróttum og stundum vinnurðu og við brugðumst vel við í dag.“

,,Á meðan þú heldur hreinu þá taparðu allavegana ekki. Ég horfi bara á næsta leik, ekki lengra en það.“

Arnar Daði Arnarsson, fréttaritari Fótbolta.net, spurði Ólaf svo út í Birni Snæ Ingason sem var ekki í hópnum.

Óli var ekki ánægður með þessa spurningu Arnars og þagði í langan tíma á meðan Arnar reyndi að spyrja hann út í Birni.

,,Nei. Hann fer ekki í glugganum eins og þú varst að spyrja mig.“