Jóhannes Karl Guðjónsson, þjálfari ÍA, ræddi við Stöð 2 Sport í kvöld eftir tap liðsins gegn KR.

ÍA tapaði 3-1 á heimavelli en liðið lenti 2-0 undir á stuttum kafla í fyrri hálfleik, það fyrra kom úr víti.

Jói Kalli var ekki ánægður með þá ákvörðun en hann vill meina að Kristinn Jónsson hafi látið sig falla innan teigs.

,,Við hleyptum KR ódýrt inn í leikinn. Við ætluðum að vera þéttari og öflugri í varnarleiknum en það breytir því ekki að KR fær gefins víti, mér fannst þetta bara vera dýfa,“ sagði Jói Kalli.

,,Dómarinn gerði ekki vel í því atviki þó að leikurinn hafi verið þokkalega dæmdur. Þetta var aldrei víti að mínu mati og það var erfitt að kyngja því. Svo fáum við 2-0 markið á okkur í andlitið og það var erfið byrjun á leiknum.“

,,Við vissum að KR yrðu þéttir til baka, þeir hafa verið það í öllum sínum leikjum. Þeir ætla ekki að fá á sig mörk og eru með gæði fram á við, Óskar Örn er einn af þeim. Við áttum ekki góðan dag.“