Lögreglan á Vestfjörðum vill vara við óprúttnum aðilum sem hafa hringt í tölvunotendur og blekkt viðkomandi til að gefa upp lykilorð að heimasíðum, netbönkum eða öðrum viðkvæmum aðgangssvæðum.
Þetta segir lögregla í færslu á Facebook-síðu sinni og kemur tilkynningin ekki til af góðu.
„Nú í síðustu viku tókst slíkum aðila að yfirtaka heimabanka einstaklings og millifæra umtalsverða upphæð. Í þessu, sem og flestum öðrum tilvikum, er um að ræða erlenda aðila sem tala flestir bjagaða ensku. Erfitt getur reynst að endurheimta slíkar millifærslur.
Mikilvægt er að svara ekki slíkum beiðnum og gefa engum upp aðgangstorð eða lykilorð.“
