Aron Einar Gunnarsson lék sinn síðasta leik fyrir lið Cardiff City í dag en hann er á leið til Katar.

Aron hefur skrifað undir samning við Al Arabi í Katar og mun þar vinna með Heimi Hallgrímssyni.

Cardiff vann frábæran 2-0 sigur á Old Trafford í lokaleik Arons en Manchester United var andstæðingurinn.

Aron gekk í raðir Cardiff árið 2011 og hefur síðan þá nánast alltaf verið fastamaður á miðjunni.

Okkar maður er elskaður af stuðningsmönnum Cardiff og kvaddi þá á Instagram síðu sinni í kvöld.

Cardiff er fallið úr efstu deild en þetta er í annað sinn sem Aron fellur með liðinu á ferlinum.

,,Það hefur fylgt því ótrúleg ánægja að vera hluti af knattspyrnuliði Cardiff síðustu átta ár þar sem ég hef upplifað bæði góða og slæma tíma,“ sagði Aron.

,,Ég fékk þau forréttindi að spila með frábærum leikmönnum, stórum karakterum og fyrir framan þessa ástríðufullu stuðningsmenn í svo langan tíma.“

,,Ég vil þakka stuðningsmönnunum fyrir að bjóða mig og mína fjölskyldu velkomna til félagsins og vona að þið sýnið þessum magnaða leikmannahóp áframhaldandi stuðning næstu ár.“

,,Þvílík leið til að klára tímabilið með 2-0 sigri á Manchester United á Old Trafford en það er svekkjandi að við gerðum ekki nóg til að halda okkur uppi. Ég er viss um að við mætum aftur bráðlega.“