„Það er búin að vera mikil streita á okkur í dag. Það er ekki auðvelt að vinna sig að því að binda enda á kapítalisma. Þess vegna er Matthías búinn að einbeita sér að því að nudda axlirnar mínar á hverjum degi, í fimm til tíu mínútur á tveggja klukkustunda fresti.“
Svo mælir Klemens Nikulás Hannigan en strákarnir í Hatara vinna um þessar mundir hörðum höndum að koma sér í gír fyrir Söngvakeppni Eurovision í Ísrael. Lag þeirra, Hatrið mun sigra, hefur sópað til sín gríðarlegum vinsældum á Íslandi og erlendis og eru ýmsir sérfræðingar farnir að spá Hatara afar góðu gengi í lokakeppninni.
Þeir Klemens og Matthías Tryggvi Haraldsson voru í viðtali vegna kynningarviðburðarins Eurovision in Concert í Amsterdam, en þar var hljómsveitin kynnt til sviðs með hinum skemmtilegu orðum: „Nú er komið að umdeildasta atriði ársins…“
Í ljósi streitunnar sem hefur nýverið hellst yfir drengina hefur Matthías ákveðið að skilgreina sig sem bæði söngvara og nuddara hljómsveitarinnar. Klemens segir að kollegi sinn sé með þétt grip og því er Matthías ekki ósammála. „Ég er afar með þétt grip á öllum hlutum“, bætir hann við með alvarlegan svip.
Þegar drengirnir eru beðnir um að lýsa stílnum sínum á framlagi sínu er ljóst að innblásturinn hafi verið fengið víða.„Við sjáum þetta lag um dystópíu, sem endurspeglar völd og valdaleysi. Þetta er myrk sýn á því sem við teljum að gæti orðið.“
Þeir segja stíl sinn jafnframt vera hámenntaðan og andkapítalískan, einnig að ópera sé mikill áhrifavaldur ásamt Cabaret, poppi og gjörningi ekki síður. „Ef ABBA væri meira marxískt,” skýtur Klemens inn. „Eða jafnvel póstmarxískt,” segir þá Matthías og bætir skjótt við: „Við viljum þakka styrktaraðilum okkar kærlega fyrir hvert einasta augnablik, bæði fyrir launuð viðtöl og viðtöl sem við veitum í okkar frítímum.“
Viðtalið má sjá í heild sinni hér:
