„Nú liggur fyrir að þessi sami forstjóri fær starfslokasamning sem nemur 88 milljónum, en það er rétt að geta þess að það tekur fiskvinnslukonu hjá HB Granda með bónus uppundir hálfa starfsævina að vinna sér inn 88 milljónir, eða nánar tilgetið um 20 ár!“

Þetta segir Vilhjálmur Birgisson, formaður Verkalýðsfélags Akraness og 1. varaforseti ASÍ, um starfslok Vilhjálms Vilhjálmssonar, forstjóra HB Granda.

Fréttablaðið greindi frá því á föstudag að laun og kostnaður vegna starfsloka hans hjá fyrirtækinu hefðu numið rúmum 88 milljónum króna. Vilhjálmur hætti sem forstjóri í júní á síðasta ári eftir að Guðmundur Kristjánsson, oft kenndur við Brim, varð stærsti hluthafi félagsins og tók við sem forstjóri.

Í frétt Fréttablaðsins kom fram að laun og hlunnindi Vilhjálms hefðu numið 693 þúsund evrum í fyrra, en í þeirri upphæð er áfallinn launakostnaður vegna starfsloka.

„Maður verður nú hálfdapur þegar maður sér svona starfslokasamning hjá forstjóra sem kom til okkar Akurnesinga í mars 2017 og sagði að því miður þyrfti fyrirtækið að hætta allri bolfiskvinnslu og segja öllum fiskvinnslukonum og mönnum upp störfum á Akranesi vegna hagræðingar í rekstri HB Granda,“ segir Vilhjálmur hjá Verkalýðsfélagi Akraness í færslu á Facebook-síðu sinni. Hann bætir við að lokum:

„Það er líka rétt að geta þess að þessi starfslokasamningur dugar til að dekka kröfur okkar um hækkun launa hjá 174 fiskvinnslukonum í eitt ár! Var einhver að tala um að ekki sé svigrúm til launahækkana hjá verkafólki?“