Róbert Ragnarsson, fyrrverandi bæjarstjóri Grindavíkur, fær rétt rúmar tólf milljónir króna í starfslokagreiðslur eftir að honum var sagt upp störfum á dögunum. Alls kostaði uppsögnin 13,5 milljónir króna. Þetta kemur fram í fundargerð frá fundi bæjarstjórnar á þriðjudag.

Það var þann 9. nóvember síðastliðinn að greint var frá því að Róbert hefði samþykkt starfslokasamning við bæinn sem lagður var fram á aukafundi bæjarstjórnar þann 8. nóvember.

Ástæða þess að starfslokasamningurinn var lagður fram, mátti að sögn að hluta rekja til brottflutnings Róberts frá Grindavík. Þá má líka nefna að hann rataði í fréttir fyrir að hafa leigt út húsnæði bæjarins, sem hann hafði sjálfur afnot af vegna starfs síns, til ferðamanna, í gegn um Airbnb.

Róbert verður bæjarstjóri til 31. janúar 2017.

Alls kostuðu starfslokin 13,5 milljónir króna sem fyrr segir og skiptist kostnaðurinn svona, samkvæmt bókun bæjarráðs:

„Laun og launatengd gjöld 12.079.000 kr. og aðkeypt þjónusta 1.430.000 kr. Aðkeypt þjónusta sundurliðast þannig:
Auglýsingar kr. 265.000, lögfræðiráðgjöf kr. 665.000 og ráðgjöf við ráðningu kr. 500.000.“