Gunnar Eyjólfsson, einn ástsælasti leikari þjóðarinnar er látinn, níræður að aldri. Frá þessu greinir RÚV. Gunnar lék fjölda eftirminnilegra hlutverka á ferli sínum, bæði á leiksviði og í kvikmyndum og hlaut einnig fjölda verðlauna fyrir starf sitt í þágu leiklistarinnar.
Fram kemur á vef Þjóðleikhússins að Gunnar þreytti frumraun sína á leiksviði í sýningu Leikfélags Reykjavíkur á Kaupmanni í Feneyjum árið 1945. Hann stundaði nám við Royal Academy of Dramatic Art í Lundúnum 1945-47 og lék um skeið í Stratford og Lundúnum. Sviðshlutverk Gunnars eru vel á annað hundrað og flest í Þjóðleikhúsinu en þar var
Gunnar fastráðinn leikari frá árinu 1961 og lék þar fjölda burðarhlutverka.
Þá lék Gunnar í fjölda kvikmynda, sjónvarpsmynda og útvarpsleikrita, meðal annars í Milli fjalls og fjöru, 79 af stöðinni, Atómstöðinni, Hafinu, Mömmu Gógó, Lénharði fógeta og Paradísarheimt.
Gunnar stofnaði Talskólann í Reykjavík árið 1983 og var einnig kennari við Leiklistarskóla Þjóðleikhússins, við HÍ, KHÍ og FB. Hann sat lengi í þjóðleikhúsráði og í menntamálaráði í rúman áratug. Þá var hann skátahöfðingi Íslands á árunum 1987-95.
Gunnar hlaut fjölda verðlauna á ferli sínum en hann vann til Edduverðlaunanna fyrir leik sinn í kvikmyndinni Hafinu og þá hlaut hann heiðursverðlaun Grímunnar árið 2013 fyrir ævistarf sitt í þágu sviðslistar á Íslandi.Hann hlaut riddarakross hinnar íslensku fálkaorðu fyrir störf sín árið 1999. Hann hlaut Stefaníustjakann fyrir störf sín að leiklist árið 2006.
