Svandís Svavarsdóttir, heilbrigðisráðherra, er nú komin með þvagleggjamálið á sitt borð en eins og DV skýrði frá í gær segir Páll Ingvarsson, sérfræðilæknir á Grensásdeild, að Sjúkratryggingar Íslands hafi samið um kaup á þvagleggjum sem geti valdið aukinni hættu á sýkingum, blóðeitrunum og nýrnabilun.

Fréttablaðið skýrir frá því í dag að málið sé nú komið inn á borð Svandísar og velferðarnefndar þingsins. Haft er eftir Bergi Þorra Benjamínssyni, formanni Sjálfsbjargar, að hann undrist vinnubrögð Sjúkratrygginga sem hann segir skaffa sjúklingum annars flokks vöru.

Blaðið hefur eftir Svandísi að hún hafi kallað eftir upplýsingum frá Sjúkratrygginum um málið en geti ekki tjáð sig frekar um það á þessu stigi.